مراجعـة رائعة جدا أخي
حمّستني لشراء سماعة رأس احترافية :D
مبارك عليك أخي العزيز، تتربّي في عزّك :p
لكن انسب قسم للموضوع هو قسم المراجعات الشخصية، راسل المشرفين لنقله
بسم الله الرحمن الرحيم
سلامى لكل اعضاء وزوار عرب هاردوير الكرام
دى اول مراجعه ليا فى المنتدى هنا
بعد ما حطيت كذا موضوع هنا استفسر فيهم على حاجات قولت لازم احط حاجة افيد فيها
مش كله استفاده من غير افاده لازم يبقى فى دم :D
الموضوع للى عاوز ياخود فكرة ويشترى بكره او اللى محتار زى مانا كنت محتار قبل كده عن شراء هيد فون كويس
والحمد لله وقع الاختيار على هيد سيت Medusa NX 5.1 Gaming Headset
جبتها بالظبط 7/1/2012 والنهارده 20 يعنى من حوالى 13 يوم قول اسبوعين
وانا اساسا عايز اجيبها من العيد الكبير اللى فات بس كل الفترة دى بسأل وبعرض وباخود معلومات
انا كنت متردد فى شرائها لانى كنت متعود على الهيد فون اللى اخرها 20 - 30 جنية
لما اجى اخو واحده اغلى من كده بأضعاف مضاعفه لازم اتأنى فى الاختيار
المهم هتكلم عن كل حاجة فيها
هتكلم عن السماعات الرائعه
هتكلم عن سماعات الصوت المحيطى الحقيقى 5.1
هتكلم عن السماعات التى ليس لها مثيل
هتكلم عن السماعات اللى بتقف على جنبها اليمين
واللى بتقف على جنبها الشمال
واللى بتضرب شقلباظ :D
واللى بتكش من السقعه
نبدأ فى الكلام على اول حاجة وهى الكرتونة
السماعات متغلفة تغليفة كويسة جدااا فى كرتونة شيك ( فى الحقيقة هى محطوطة فى كرتونتين مش كرتونة واحده )
لأن لو تلاحظو فى اول صورة فى الموضوع السماعات نصها طالع لبره علشان يتشاف ع الطبيعة وبرضو متغلف
فجسم السماعه محطوط فى كرتونة ودراع من السماعه طلع منها لاكنه لا يزال جوى الكرتونة الكبيره
اللى مش فاهم عايز اقوله ان السماعه جوى كرتونتين وخلاص
نرجع لموضوعنا من اول هنا كل ده من تصويرى الشخصى مش صور من ع النت
دى صورة للعبة الاولى
ودى صورة تانية للعلبة
ودى صورة ثالثه ليها بس من احد الجوانب
ودى صورة من الخلف فيها شوية كلام كتير دش دش دش مش مفهوم منه حاجة بس اهو عامل منظر برضو
ودى بقى صورة الكرتونة التانية اللى هى الداخلية اللى جوى الكرتونة الكبيره السابقة
ودى صورة الجراب بتاعها
جراب مدور وكبير وحلو وشيك وامور ولذيذ وحاطط فازلين :D
والجراب فايدته انك لو هتاخود السماعه معاك مكان حطها جوى الجراب يحافظ عليها ويلمها
واهو اشيك من الكيس البلاستيك ولا ايه :D
دى بقى صورة شاملة لكل حاجة ما عدا الاسطوانة نسيت اطلعها
ومفتكرتش الا بعد ما رفعت الصور
والصورة بتحتوى الجراب السابق ذكره
وحاجة زى كتيب كده بيتفتح لونه اسود وعليه كلام وهو واضع فى الصورة ورا السماعه
بالاضافة للسماعه نفسها
وشوية كابلات معرفوش بيعملو ايه بس هو مكتوب فى الكتالوج انهم عشان التوصيل بريسيفر
المهم
واداكتور وده فى نهايتة usb بيتوصل بال usb بتاع السماعه عشان لو معندكش usb فى الكيسة بتاعتك
عاملين حساب كل حاجة
كفاية بقى صور وتعالو نرغى شوية عن المميزات
وبعدين نرجع نكمل بقيت الصور
السماعات من اول ما جبتها ووصلتها وهى للوهله الاولى صوتها كان راائع جدا وعالى جدا ونقى جدا جدا جدا وحطو تحت كلمت نقى 300 خط :D
وده طلع على نظام الاستريو مش 5.1 لأنى اساسا كنت موصلها غلط كنت موصل الكابل الاحمر بتاع الميك والكابل الاخضر بس والباقى قولت ملوش لازمة
اتاريه طلع ليه لزمة وعملت موضوع هنا فى القسم اسأل فيه والناس مقصرتش بصراحة وعرفونة اذاى اوصلها صح
وتم توصليها وتم تفعيل نظام ال 5.1 وهنا السماعه نقلتنى لمرحله صوتيه مختلفه تماما بعيداااااااااااا جدا اوى تلات اربع حاجات
سماعتين اماميتين وسماعتين خلفيتين وسماعه فى النص وصاب كمان .. اشى خيال يا ناس :D:D
فى الالعاب زى Battlefield 3 اللعبة من اسمها انها ساحه قتال وفعلا السماعه بتدخل اللى بيستخدمها جو القتال والحرب فعلاااا
صوت اى حد بيقرب منك حتى لو زميلك هتسمع صوت رجله وهو ماشى . صوت الرصاص استطيع ان احدد اتجاهه جيدا وبموت برضو :D
اصوات الاجواء والمركبات والطيارت والمدفعيات وكل كل حاجة عارف احدد صوتها كويس وعارف هى جايه منين بالظبط من اى اتجاه يعنى
بالنسبة للعبة Assassin's Creed اى اصدار من الاربعه مثلا على سبيل المثال بعد تجربة Assassin's Creed Brotherhood هتحس انك اتسيو البطل فعلا
هتعيشك جو الحروب الجاهلية والعصر بتاع زمان اوى ده :confused:
وصور انفعال اتسيو فى القتال وصور الألم بتاع الحراس او الملوك اللى بتقتلهم فى المراحل وصور الناس اللى بترغى فى الشارع اللى بتعدى عليهم
ولو انت فى مرحله معينه وحد بتكلم لو اتحركت وانت ماشى معاه روحت يمينه هتسمع الصوت جاى من الشمال بس
ولو روحت شماله الصوت هييجى من اليمين بس يعنى فى تحديد رهيب
بالنسبة للأفلام على سبيل المثال فيلم تيتانيك نسخه 720p عامله 6 جيجا لأول مره هتتأثر بالمشاهد من شده مؤثرات الصوت
الفيلم طلع فيه اصوات ومؤثرات مسعتهاش قبل كده
وجربت فيلم افاتار نسخه ac3 عامله 2 جيجا وحبه ولك ان تتخيلو كم المؤثرات الفظييييييييييييعه فى الفيلم
جيك سولى البطل لما كان رايح مع البنت اللى هيحبها بعدين لما راح للقبيلة بتاعتها استطيع ان اميز كل صوت من قبيلتها اللى برا المشهد اصلا اللى هو كان بيمشى فى وسطهم
ولو هو خبط فى اى حاجة زى زرع او ورده قادر انى اسمع صوت اصطدامه بالزرع ده
وتم التجربة ايضا على فيلم Transformers Revenge of The Fallen 2009
و Transformers Dark Of The Moon 2011
ولكم ان تتخيلو برضو كميلة الاندماج الكلى بينك وبين الفيلم من كتر المؤثرات اللى فيه وصوت الكائنات الاليه وصوت الحروب والقتال حاجة رهيبه رهيبه
بالنسبة بقى للأغانى وخصوصا الفلاك حاجة تانيه خااااااالص ومتعه تانية خالص والموسيقى نقيه جدا كأنك قاعد جنب اللى بيعزف او انك موجود ف الاستوديو مع الفنان نفسه
مفيش اى نقطة تشويش واحده تذكر
وعلى فكرة دى اول مره اعرف ان سماعات الراس فيها bass اصلا بالقوى دى
كفايه بقى رغى ده كده كتير اوى نرجع بقى للصور
دى صورة بتوضح ضخامه السماعه مع سماعه تجارية ب 20 جنية ( ودى سماعتى العزيزة كانت افضل سماعه تجارية جربتها فى حياتى )
ودى صورة لمتحكم الكنترول بتاع الصوت
وشكله حلو وجميل وامور ولزيز وكمان فيه لمبه حمرا بس لما تشغل السماعه لانى كنت فاصلها عن الجهاز وانا بصور
والمتحكم فيه 4 - 5 حاجات
واحد بيطفى السماعه كلها وبيشغلها
وواحد متحكم للسماعات الامامية وواحد للخلفية
وواحد للسماعه السنتر اللى ف الوسط يعنى
وواحد للصاب والبيز والدب دب :D
دى بقى صورة الكابلات اللى انا وصلتها غلط ف اول يوم جبت السماعه فيه
ووصلت الطرف الاخضر والاحمر بس واستغنيت عن الباقى
اتارى كان ليهم لزمة كبيره ف الصوت المحيطى
دى صورة المخده اللى ف جسم السماعه من فوق ودى بتخلى السماعه تمسك وتركز حلو اوى ع الدماغ
ودى صورة السماعه من احد الجوانب
ودى صورة تانية لجنب من السماعه اللى اكيد كان الجنب الاخر
ودى صورة مقربة للمخدات اللى عايز اقول عنها شعر :D
اولا هى من خامات عالية الجودة وكبيره اوى وتخينه اوى ومبططه اوى
ومريحة اوى اوى اوى اوى
عايز اقولكم ان الودان بتغطس جوى السماعه وبيكون المخده دى متحوطة ع الودن
يعنى مهما كانت ساعات الاستخدام كتير مش هتوجع الاذن ابدا
انها مريحه للغاية
ودى صورة الميك اللى مبستعملوش الا مره واحده بس للتجربة
اللى عايز اقول بعد تجربته عايز اقول لأول مره المغنيين دول بيتعبو عشان يطلعولنا الاغانى بالشكل النهائى اللى بيطلعلنا
سجلت لنفسى مقطع والميك شديد الحساسية لو اخدت نفس بس صوت نفسى بيطلع ف المقطع
لازم اكتم نفسى وانا بغنى :D عشان الصوت يطلع عدل عشان الميك حساس اوى بيلقط اى صوت بدرجة نقاء عالية جدا جدا جدا
-- -- -- -- --
فى النهاية كل المميزات دى بتمن زهيد وهو 195 جنية من كمبيومى مى اللى ف سموحة
مع ضمان سنة
السماعه دى بتنافس سماعه تانية اسمها روكت كاف
ودى ب 650 جنية وهما الاتنين نفس الجودة الصوتية تقريبا
والسماعات دى كمان تمنها بره بما يعادل عندنا 650 جنية
بس كل اللى موجود فى مصر هاى كوبى لاكنه بنفس الجودة ونفس الراحة
عايز اقول ان السماعات ازهلتنى وعجبانى جدا
وعايز اقول ان ريزلوشن الصور الاصلى 1600 فى 1200 بس تم تقليله ل 800 فى 600 عشان مياخودش وقت كبير فى التحميل اثناء فتح الموضوع
والصور كلها عليها لوجو الموقع واسمى عشان لو اتنقل بره والصور كلها مرفوعه على اكونت خاص يعنى الصور مرفوعه 3 سنين على اقل تقدير بأذن الله
ويارب يكون التقرير عجبكم وده اول تقرير ليا ف المنتدى هنا فى عرب هاردوير وسعيد بوجودى معاكم
والسلام عليكم ورحمة الله وبركاته
مراجعـة رائعة جدا أخي
حمّستني لشراء سماعة رأس احترافية :D
مبارك عليك أخي العزيز، تتربّي في عزّك :p
لكن انسب قسم للموضوع هو قسم المراجعات الشخصية، راسل المشرفين لنقله
[LEFT][B][COLOR=#0000ff]CPU: I7 2700K OC 4.5GHZ[/COLOR][/B]
[B][COLOR=#0000ff]Motherboard:[/COLOR] [COLOR=#0000ff]AsRock Fatal1ty P 67 Performance[/COLOR][/B]
[B][COLOR=#0000ff]video card: MSI GTX 660 Ti OC[/COLOR][/B]
[B][COLOR=#0000ff]RAM: Corsair Vengeance 2x4GB DDR3 1600Mhz CL 8[/COLOR][/B]
[B][COLOR=#0000ff]HDD: Seagate 500 GB Maxtor 7200RPM 64MB Sata II[/COLOR][/B]
[B][COLOR=#0000ff]Cooling: Cooler Master Hyper 212 Plus[/COLOR][/B]
[B][COLOR=#0000ff]PSU: Corsair CX 500W[/COLOR][/B]
[B][COLOR=#0000ff]Case: CoolerMaster HAF 912 Advanced[/COLOR][/B]
[/LEFT]
الف مبروك السماعات , والصراحة موضوع الصوت المحيطي لل Headset مكنتش مقتنع بيه غير لما جربته مع التحفة الفنية Plantronics GameCom 777 \ 7.1.
كن مع الله ولا تبالي
The Ωverclocker
أنا جبت السماعة دي في العيد الكبير اللي فات من سبينس اللي في سيتي ستارز
أول واحدة أشتغلت 3 أيام فقط و بعدين وحدة ال vibration وقف روحت غيرتها بواحدة جديدة و شغالة كويس الي الأن
السماعة كويسة و أفضل حاجة فيها هي الصوت المحيطي
لكن للأسف مش عارف أستغل الخاصية لأني بستخدم اللاب توب كتير الأيام دي فشغال علي السماعات front فقط
لكن تجربة الصوت المحيطي حلوة جدا علي الديسكتوب خصوصا مع كرت زي creative xtreme gamer
ألف مبروك علي السماعة
الف مبروك .. مراجعة جميلة
الف مبروك يا باشا المراجعة بصراحة ممتازة وتخلي الواحد يحب يقرأها
مراجعة جيدة للغاية و مشجعة على شراء واحدة زيها :D
مراجعة جيدة اخى محمود والسعر ممتاز لهيدست ٥.١.... الف مبروك
مرورك الاروع عزيزى نورتنى بمرورك ولا تتردد فى شرائها لو لقيتها
الله يبارك فيك تسلم على مرورك نورتنى
هى فعلا صوتها المحيطى روعة
ونورتنى بمرورك
الله يبارك فيك مرورك الاجمل
الله يبارك فيك منورنى يا غالى بردك
لا تتردد فى شرائها لانها فعلا روعة ونورتنى بمرورك
تسلم على مرورك وفعلا سعرها حلو جدا ل 5.1 لان اللى ف امكانياتها ب 650 دى كده حلو اوى والله يبارك فيك نورتنى
مشكور اخي علي المجهود الكبير وصراحه حمستني لشراء هذه السماعه ،
بالمناسبه هل تمتلك كارت صوت خارجي ؟
اكيد بيفرق بس لما يكون عندك نظام صوتي محترم
انا كنت بسأل بس عشان انا عايز اجيب السماعه وعندي الكارت بلت ان برده وخوفت الصوت المحيطي ما يشتغلش :D
انا اشتريتها بلفعل وهى مسلية جدا الحقيقة
لا متقلقش اتوكل على الله وهاتها هى تحفة
وانا شغال ع البلت ان برضو والبورده عندى G41 ب 3 مخارج صوت بس بضطر استغنى عن كابل المايك لعدم الحاجة اليه لانها اربع اطراف و usb
ولما بحتاج الميك بشيل كابل منها واحط الميك وبعدين ارجع كل حاجة زى ما كانت . وكده كده غالبا انا مبستخدمش الميك فمخلي الكابل بتاعه برا
الف مبروك عزيزى تتهنى فيها
up
للأفاده
المفضلات