بسم الله الرحمن الرحيم
بعد السلام والتحية اتمنى تكونوا بالف صحة وسلامة :ah7: :-

حابب اتكلم في موضوع في غاية الاهمية يتعلق بمستقبل كل الشباب الطموح الشباب الي عاوز يبني مستقبله وعنيه على بكره اقدم لك ما توصلت اليه من معرفة وخبرة في هذا المجال متمنيا لكل شاب وشابه التفوق والنجاح من القلب موضوع النجاح في مجال تكنولوجيا المعلومات ومتطلباته كبير لكن ححاول اختصر على اهم النقاط واختصر على اد ما اقدر والله المستعان.
----------------------------------------------------------------------------------------------------------------
قبل اي اي حاجة اتمنى ان الي يقرا هذا المقال انه يكون ايجابي والي عنده اي افكار سلبيه يحاول يغير فكره للافضل يعني الي عنده افكار زي المجتمع محبط مفيش فرص مفيش شغل الدنيا متقفله الشغل بالفهلوه والواسطه احب مبدئيا ان اطمنكم في شغل كتير في فرص بس كل ما في الموضوع ان احنا للاسف كشباب بنكتشف الحقائق متاخر ومفيش حد ارشدنا لطريق الصواب من بداية اول يوم في الجامعة واسباب كتير خليت معظم الشباب محبط واول ما يتخرج يصدم بالواقع لكن بجد الحياه فيها فرص كتير واختيارات كتير بس فكر صح وابتدي صح واجتهد وتوكل على الله علشان تنجح في هذا المجال لازم ترسم ليك طريق وهدف واضح وتمشي عليه وتتوكل على الله بكل قوة وربنا ان شاء الله حيكرمك
----------------------------------------------------------------------------------------------------------------
قبل كل شيء برضه عاوزك تعرف احنا في انهى قرن احنا في قرن 21 قرن المعلومات زمان الدنيا كحضارة كانت حضارة زراعية تعتمد على مجهود الانسان وبعد كده جت الحضارة الصناعية ودي بتعتمد على راس المال احنا دلوقتي في زمن المعلومات والاتصالات ودي بتعتمد على المعرفة شعارها knowledge is power زمن المعرفة قوة فالنجاح دلوقتي لاي فرد او دوله هوا knowledge فالشركات والمؤسسات والحكومات الي عاوزة تتقدم لا مفر ادامها من تبني تكنولوجيا معلومات تساهم في تقدمها وبالتالي الفرد مننا كشباب لازم يعوا النقطة دي.
--------------------------------------------------------------------------------------------------------------------

وبرضه قبل كل شيء اقولك نبذة عن طريق الشباب في مصر :-
1- ثانويه عامه فاشله بتدخل كل شاب وشابه في غير مجال طاقاتهم وقدراتهم واحلامهم.
2- بعد كده جامعة مبنيه على الحشو والتخلف تزاكر مواد باليه عفا عنها الزمن وتلاقي دكاترة متعصبين ومتكبرين على شويه معلومات باليه يعقدوك عقبال ما تنجح وتتخرج
ولا تاخد اي شيء يغير من شخصيتك وطرقة تفكيرك واعتقاداتك ويزيد من مهاراتك التخصصية في مجالك والشخصية فتلاقي نفسك بتعد 4 سنين او 5 هندسة طالع عنيك
على الفاضي فعلا ولكن المحصله النهائيه هيا اسم جامعة في ورقة اسمها السيرة الذاتيه وهو ده انت !!!! في زمن الشركات عاوزة اخر ما توصل اليه العلم والتكنولوجيا

3- تاخد شويه كورسات انجلش على كمبيوتر في السريع علشان تنجز او تدخل الجيش العظيم يعطلك حبتين وبرضه متوصلش للي فعلا انت عاوزة وبتحلم بيه

4- تعد على قهوة الاحلام وتحلم بوظيفية قوية في مجالك يا في مصر يا بره وتفضل تحور على الظروف والحكومه والبلد وكل ده تضييع وقت

5- يزداد ضغط الوقت فيزداد الاحباط فتقل العزيمة فتنزل تتظاهر في اقرب مظاهرة وتبدي انزعاجك الشديد من الوضع خصوصا لو شفت صاحبك الغبي اشتغل بالواسطه سوري في استعمال لفظ غبي ما هو لو زكي كان اشتغل بمجهوده

ده باختصار الطريق المعروف لحوالي 95 في الميه من الشباب الحالي والقادم سوري ده للاسف الواقع
--------------------------------------------------------------------------------------------------------

طيب مبدئيا علشان تنجح في اي مجال وخصوصصا مجال تكنولوجيا المعلومات لازم تتبنى هذة الافكار وتبقى جزء من شخصيتك :-

1- ان افضل وقت علشان تنهل من العلم هيا فترة الجامعة بعد ما تخلص ضغط الثانويه العامه المتخلفة ومش مهم انت دخلت كليه ايه حقوق تجاره خدمه اجتماعية هندسة الشركات معظمها دلوقتي عندها تفهم للموضوع ده واهم حاجة عندها انت بعرف تعمل ايه وحتفيدها بايه في المجال ولو خريج اي جامعه

2- ليه بقول فترة الجامعه احسن فتره لاسباب كتير اهمها احسن وقت مخك فيه شغال وطاقتك الذهنيه وحماسك عالي مفيش ضغوط عليك كون اي شخصية انت بتحلم بيها براحتك اطمح براحتك زاكر براحتك انهل من العلم الي انت اخترته مش الثانويه والظروف والاهل اختاروه يعني افرض الظروف دخلتك حقوق طز انجح في حقوق وخلاص وركز في مجالك الي بتحبه وذاكر وخد شهادات وظبط امورك علشان تلاقي المستقل مفتوح بين اديك واختياراتك متعدده

3- لازم تلغي فكرة ان العلم بينتهي بانتهاء الكليه وتفرح وتقول هيه هيه خلصت لا لا دي فكرة في المجتمع المصري فاشله جدا لازم تؤمن بفكره Long life learning التعليم مدى الحياه ليه لان كل يوم العالم بيطور والتكنولوجي بتتطور فلازم تلم وتبقى على علم بكل جديد علشان مش بس تقدر تنافس في السوق ده علشان تستمر ومتتهمش

4- لازم لازم لازم تبقى على مستوى عالي جدا من الاخلاق احب اقولك اخر مقوله للنجاح في الشركات العالميه ان النجاح 90 في الميه يعتمد على الشخصية و 10 في الميه على المعلوات فلازم تتمتع باخلاق عاليه يؤسفني ان احنا مجتع بيقول عكس الي بيعمله اقصد ايه بالاخلاقيات يعني انك تنشر العلم للناس مش تداري على شمعتك لا متخفش انك تحافظ على خصوصية اجهزة الناس انك تؤمن باهمية العمل الجماعي انك تحترم الوقت ووقت الشركة وتحاول تضيف شيء للشركة وتطور مش تعمل زي العاملين في الحكومة تلت اربع اليوم كلام وحوارات واكل وشرب وبس اخر احصائية للتنمية البشرية العالميه بتقول ان انتاجية الموظف المصري في 8 ساعات ربع ساعة من الانتاجية الفعليه !!!! ودي حقيقة بعد ما يحور ويتكلم عن الكوره والحكومه والناس ويروج الاشعات ويشرب الشاي ويفطر ويتغدى ويريح حبتين لا لازم تتعلم اخلاقيات العمل وتبقى جزء من شخصيتك اثناء الكليه وتتعلم communication skills و time mangment و mangerial and technical skills وابعد عن الفهلوة وايوة يا باشا ويا بيه والنم والمحاباه والحركسة للمدير وحب الوصول عيب ابتدي حياتك العمليه باخلاق عاليه نصيحه

5- اؤمن باهميه الوقت وان اليوم الي يضيع منك من غير ما تاخد معلومة جديدة او تتبنى فكر جديد او تتعرف على شخصيات ايجابيه ومعارف محترمين وذو فكر هو يوم خسارة ليك

6- اؤمن باهميه العمل الجماعي وبلاش تكون متأفل كده وخايف وخجول وخايف من الحسد والكلام الفاضي اطلق العنان لشخصيتك وتعامل مع الناس وفيدها واستفيد

7- اقرا ثم اقرا ثم اقرا في مجال تخصصك الي بتطمح ليه سواء شبكات سكيوريتي قواعد بيانات برمجه وطبق ثم طبق وخليك ماهر في البحث عن الماتريال سواء كتب او اسطونات

8- لازم تعرف ان ربنا سبحانه وتعالى خلق الانسان في كبد يعني علشان تنجح وتتعايش في الدنيا لازم تشعر بنوع من المعاناه وتجتهد ولكن طبعا سبحان الله بحكمته ربنا مبيضيعش مجهود حد فاعمل الي عليك باتقان وسيب بكره على ربنا بس امسك في الحاضر ويومك ده استغله احسن استغلال

9- ودي اهم نصيحة ابعد عن اي فكر عقيم غير منتج زي الافلام المصريه والاعلام والجرايد الفاشله والاصدقاء المحبطين والرجعيين والسلبيين والتافهين متسمعش لاي فكر
وفلسفة متساهمش في مستقبلك ابعد عن فكر دكتور الجامعه الععيقم الي عاوزك تنجح في الحياه في انه ينصحك يطلع عنيك طول الترم علشان تنجح في مادته الباليه الي عفى عنها الزمن وسايس والدك او والدتك الي يقوللك يا بني ركز في الجامعة وخد الشهادة الكبيرة العاليه فوق وبعد ما تخلص اعمل الي انت عاوز تعمله هههههه لا سايسهم طبعا دول اغلى الناس وقول حاضر وانت بتزاكر زاكر في اليوم حبه للجامعة وبقية اليوم mcitp مثلا ويشفوك بتعمل ايه قولهم بزاكر للجامعه (-_-) ابوك وامك سايسهم لكن صاحبك الي يقولك يا راجل كورسات ايه وشهادات ايه دي للمهندسين بس او لو انت في هندسة يقولك صاحبك مهندس المستقبل يا راجل ابعد عن الكورسات دي ده اغلب الشعب اخدها هذا النوع من الصحاب نصيحة البعد عنه مكسب شديد امسك في صاحبك الي يقولك تعالي يا اخي نزاكر الكورسات دي علشان نتفوق ونتميز لما نتخرج ده متسيبهوش ابدا
---------------------------------------------------------------------------------------------------------------

اسف طولت عليكم نبتدي بقى طيب نعمل ايه علشان ننجح في المجال ال IT:-

1- اول واهم خطوة حدد هدفك حدد المجال الي ممكن تبدع وتتميز فيه ادامك شبكات ادامك برمجه ادامك قواعد بيانات طيب ازاي تحدد المجال حديلك شويه قياسات
اول حاجة انت قادر وحتحب المجال ده ولا لا ثاني حاجة السوق واخر ما توصل ايه في المجال ومرتباته ومستقبله وعاوز اقولك نصيحة اخ في النقطه دي اهم حاجة انك
تحب المجال الي انت عاوزة مش تقول لا ده السوق مرتبات الناس في المجال ده اكتر فتدخله لا عاوز اقولك ان كل المجالات ليها مستقبل عالي لانها كل يوم بتتطور
وفيها جديد فحدد المجال اولا على حسب الي انت بتحبة وتقدر تبدع فيه وجرب علشان كده بقولك افضل وقت وقت الكليه جرب نزل الماتريال وفتح وطبق عجبك
مثلا الشبكات كمل وابدع ملقتش نفسك فيها جرب قواعد البيانات واركز على مجال وميشتتكش اي حوار او اي رأي واثبت وكمل على الخطوة 2

2- اخترت وليكن مجال شبكات ابتدي في الطريق من اوله ظبط الاساس كويس جدا جدا وزاكر N+ وبعد كده خد سوفتوير mcitp وهاردوير CCNA واكبر بقى CCNP وشكل معاك وقتك مفيش ضغوطات زاكر واتفسح في اخر اليوم واطلع على احدث المقالات في النت وفي عرب هاردوير خاصة وشوف نصايح الخبراء وتعامل واتعرف
طب لو اخترت برمجه خد java وبعد كده visual .net وبعد كده C# المهم خد اكتر من ماتريال في نفس المجال لان السوق دلوقتي حاليا بيفضل المتقن لاكتر من technology وطبعا مش حوصيك انك تعمل ابديت علطول

3- امتحن ثم امتحن ثم امتحن انا عارف ان الشهادات اي حد ممكن ينجح وياخدها لكن لازم انت تمتحنها وتنور بيها السرية الذاتيه بتاعتك حتضيف ليك value وتميزك عن غيرك

4- انشر العلم اشرح لاصحابك انصحهم اشتغل انستركتور بارت تايم لو عندك موهبة الشرح العلم بيزيد بانفاقه

5- اشتغل ولو ببلاش لو قدرت في ايام الكليه اهم حاجة الاجازة تاخد تدريب في مجالك في الشركات تشتغل ولو ببلاش وتضيفها في السيرة الذاتيه حتى لو اشتغلت في حاجة
او اتدربت في حاجة غير تخصصك الي بتحلم بيه اكتبه دي اضافة ليك اكيد استفدت حاجة من الفترة التدريبة او الشغل ده

6- ذاكر لوحدك وطبق لا تعتمد بتاتا على الكروس فقط ويا ريت تذاكر self study احسن يا ريت علشان ممكن تشتغل في تكنولوجيا جديدة زي ما حصل معايا مثلا فلو عندك
موهبه الدراسة الذاتية دي تخليك تظبط اي تكنولوجيا جديدة وخليها جزء من مهاراتك وشخصيتك

7- ظبط ال cv بتاعك واهتم بيه وكل سنه ها ضيفت ايه جديد تدريب جديد شهادة جديدة زاكرت تكنولوجيا جديدة واتقنتها مهارة شخصية جديدة انجليش او اي لغة
لان السي في بتاعك ده هوا نتاج الي عملته في الكليه وهو مفتاح تميزك فارجوك متطلعش الكليه كاتب اسم الجامعه او المعهد واسمك بس

8- حتى لو دخلت جيش سنة او 3 سنين متعلش هم بكره يبقى وقت الكليه بلور امور كتير ولما تخلص جيش تضيف وتعمل ابديت ليه بس مش تبدي لسه من الاول وتبقى زعلان على الايام الي راحت في الجيش

9- اعمل وذاكر واجتهد وسيبها على الله وتوكل عليه وعنيك على بكره ظهرت تكنولوجيا جديدة فرصة ليك علشان تظهر ظهر اتجاه جديد في السوق او اتغير في مجالك جدد نفسك واتغير معاه

10- عملت السي في واتخرجت قدم في شركات التوظيف في مصر وهما يجبولك المناسب ليك والي انت كاتبة في السي في وانت اعد في البيت وقدم في النت ومعارض التوظيف

11- باذن الله ربنا يكرمك وتشتغل متنساش تحمد ربنا وتنصح غيرك وبرضة متنساش انك تعمل ابديت وتطوير دايما لنفسك

-------------------------------------------------------------------------------------------------------------------
اسف لو طولت عليكم لكن للحديث بقية واتمنى يا رب ليكم التوفيق جميعا من القلب
اهم شيء متحبطش ولا تعلول هم لان ربنا موجود ورزاق وان علت هم عول هم المعلومه والعلم لان ده هوا الي حيكبرك

اخوكم
Ahmedhalo