برجاء المساعدة للأهمية عايز أعرف الدراع الـ PS3 ده أصلي ولا لأ

**أهلاوى سوبر** · 15-03-2019, 00:59

السلام عليكم
إشتريت دراع PS3
على أساس إنه أصلي
لكن في ناس تقولي كوبي و ناس تقولي أصلي
و أنا إحترت جدا و عايز أعرف أصلي ولا كوبي

بعض الناس تقول
طالما مكتوب على ضهره حرفين CE يبقى أصلي لأن الكوبي بيكون حروف NOM
و اللي يقول إن الكود اللي أخره 2E يبقى أصلي لكن لو اخره مثلا 2A أو غيره يبقى كوبي
و اللي يقول طالما موجود شكل المثلث اللي جواه دايرة فيها علامة صح يبقى أصلي

و اللي يقول إن اللي مسماره بوزه مبطط مش سن يبقى أصلي و اللي بسن كوبي
و اللي يقول ده كوبي علشان موجود في كرتونة و ان الاصلي بييجى من غير كرتونة
و اللي يقول ده كوبي علشان البوردة بتاعته صغيرة و الاصلي بوردته كبيرة
و رد معاكس للنقطة دي ان الاصلي في منه اصدارين اصدار قديم بوردته كبيرة و اصدار جديد بوردته صغيرة اللي هو معايا ده

انا و الله احتارت مابقتش فاهم حاجة ولا عارف اتاكد من الدراع
انا صورت الصور دي للتوضيح

في انتظار الرد
و الف شكر مقدما

**الواد ميشو** · 15-03-2019, 21:04

شكرااا لذوق حضرتك والمجهود في سرد الاستفسار..
هو سعر(ك جديد) ومكان الشراء يفرقوا كتير
يعنى اعتقد ان الحاجة الاصلية او توكيل ممكن تكون عند جيم فالى..
غير لو قدرت تروح أي محل عنده PS3 وتسأله بمعنى فين الدراعات اللي جايه مع الجهاز وتشوف ظهرها مكتوب عليه ايه بالظبط..

ولك كل التقدير والتحية
وأهلا بك في المنتدى

**أهلاوى سوبر** · 16-03-2019, 20:55

أولاً بشكرك جداً على رد حضرتك

ثانياً
بالنسبة للسعر اللي إشتريته بيه هو 790 جنيه و جديد و مكان الشراء من محل مشهور في إسكندرية ـ( مش عايز أذكر إسمه علشان لو ممنوع في المنتدى )ـ
و أنا فعلاً شوفت دراع في محل الكتابة اللي عليه مختلفة ... لكن أراء تانية قالولي إن ده أصلي بإصدار جديد يعني بوردته صغيرة مش كبيرة زي الإصدار القديم و الكتابة عليه مختلفة شوية

ثالثاً
هو فين توكيل سوني في مصر اللي أقدر ألاقي عنده الدراعات الأصلية للـ PS3 مع العلم إن معظم الناس بتقول إن الشركة وقفت تصنيع الدراعات دي أصلا فمش عارف في منها أصلي في مصر ولا لأ

**الواد ميشو** · 18-03-2019, 15:50

تماام
هو كسعر صعب جداا حد يبيع دراع كوبي بالسعر داه...
وكان القصد من محل تشوف الدراع الاصلي اللي كان جاي مع الجهاز مش أي دراع وخلاص(قصدي أن تكون تأكدت من تلك النقطة-فعلى الاقل هيكون فيه تشابه بشكل أو بأخر)
وأنا ما قصدتش توكيل سوني- معلش كان قصدي من جيم فالى لانه يعتبر بيبيع حاجات أصلية

وحاليا عندي دراع (أكيد كوبي والكتابة في الخلف مش زي ما ظاهرة عندك) ونفس الموديل بس آخره\أ بدل حرف الــA الصغير مكتوب عندي A1
وا ن شاء الله يكون أصلي\وحالو تدور في موقع سوني زي تسجيل للمنتجات وتدخل السريال نمبر

وبالتوفيق ....