واحد من اشهر مول الكمبيوتر علي مستوي محافظة القاهره و مصر , مول مختص في بيع كل مستلزمات الكمبيوتر و الاب توب و صيانتهم ايضا
بيتكون مول سوق العصر من 3 ادوار ده علي حسب ما طلعت
الدور الاول و الدور الثاني محلات لبيع و تجميع الكمبيوتر و الدور الثالث متوفر فيه محلات صيانه متخصصه و بيبقي فيه محلات لبيع الشاشات و الاجهزه المستورده المستعمله .
اين يقع مول سوق العصر :
- مش محتاجه اجابه يعني اركب تاكسي و قوله وديني مول سوق العصر
- العنوان 50 شارع الخليفة المأمون , روكسي , مصر الجديدة , القاهرة التليفون: 02-2259-0280, 02-2455-3929
لو انت جي من ناحية العباسية هتخد طريق جامعه عين شمس علي طول في اتجاه روكسي , اول ما هتلف شمال علي شارع الخليفه المأمون انزل هتلاقي مول سوق العصر قدامك , ممكن تركب تاكسي بقي من العباسيه او تركب اتوبيس المهم انه هيكون ماشي علي طول ناحية روكسي او
لو هتخد المترو هتنزل في محطه سرايا القبه اتجاه المرج و تطلع تركب ميكروباص او تاكسي و تقوله مول سوق العصر 4 دقائق هتبقي هناك او ممكن تتمشاها لو صحه صحه او
لو انت جي من خارج القاهره من رمسيس , أركب اي عربيه مكتوب عليها روكسي و قول للسواق نزلتي عند مول سوق العصر للكمبيوتر . ايه الي بيميز مول سوق العصر :
- من مميزات مول سوق العصر انه بيقع في منطقه كلها مولات و محلات كمبيوتر , مول سوق العصر هتلاقي جنبه مول كوين و مول السخاوي و مول كمبيو و غيرهم من محلات الكمبيوتر فلو فرضا لم تجد الحاجه الي انت عاوزها في مول سوق العصر وده شئ شبه مستحيل هتتمشي خطوتين و هتلاقي حاجتك في المولات الي حوليه ..
- من المميزات ايضا ان المول ليه سمعه كبيره جدا من زمان سوق العصر معروف و غير ان المحلات فيه كتير جدا جداد يعني هتلاقي في الدور الواحد ما لا يقل عن 30-40 محل كبار .
- المول فيه محلات كمبيوتر ليها اسم و شهره كبيره زي محل ماكسيمم هاردوير , ماجيك , كمبيوداتا و غيرهم .
- في محلات بعض المول بتقبل الدفع بالفيزا , ده غير ان في علي مدخل الموب ماكينه ATM تبع البنك الاهلي تقدر تسحب منها الفلوس .
- ده غير ان اكبر الشركات و الموردين بيوردوا المنتجات الحديثه اول باول للمول فاي سلعه تعرف انها نزلت مصر اكيد هتلاقيها في سوق العصر . ازاي تشتري الحاجه بافضل سعر :
في ناس كتير بتنزل مثلا واحد عاوز يجمع كمبيوتر بس بيبقي نازل مش عارف الاسعار , فبيبقي قدامه طريقتين الاولي : انه يتصل بابن خاله عم مرات عمه علشان ينزل معاه و يبقي هو فاهم في الاسعار
او الثانيه الي احنا هنقولها دلوقتي مع بعض
حاول انك تدخل علي مواقع الي فيها اقسام ( نصائح تجميع الاجهزه ) زي منتدي الدي في دي العربي فيه قسم لذلك و منتدي عرب هاردوير فيه قسم لذلك ايضا
اعمل موضوع و اطلب نصائح الناس هناك بالنسبه لميزانيتك و اعرف الاسعار قبل ما تنزل
طيب انت نزلت و روحت علي المول علي طول و داخل تشتري و مش عارف الاسعار , يبقي تعمل التالي
هتدخل اي محل يعجبك تقوله مثلا انا عايز اجمع الجهاز اكتبلي الامكانيات و السعر في ورقه , وتخد الورقه و تقوله هبص كده علي حاجه هشتريها و هجيلك , تلف علي المحل و تكرر الموضوع تشوف الامكانيات و الاسعار , و الي اسعاره افضل و سمعته كويسه توكل علي الله و اشتري منه
وبشكل عام المحلات كلها بتبقي اسعارها زي بعض بيزيد 10 جنيه يقل 10 جنيه , بس في بعض اصحاب المحلات لما بيلاقوا الي داخل ليهم مش فاهم حاجه بيستغلوا النقطه ديه و بيزودوا عليه الاسعار .
المصدر
https://tgrba.com/shopping-experiences/souk-el-asr-computer-mall.html
مول سوق العصر للكمبيوتر
.
رد مع اقتباس
المفضلات