ارجوكم مسااااااااااااااااااااااااااعدة فى اختيار موبايل (عنوان معدل)

[mr_mizo]

السلام عليكم ورحمة الله وبركاته

اخوانى ان شاء الرحمن انا ناوى اشترى موبايل الشهر القادم شهر مارس

وبعد بحث لقيت ان الميزانية بتاعتى تكفى واحد من الثلاثة موديلات دول :


1- Samsung i8910 Omnia HD

2- Samsung i8000 Omnia II
3- Samsung S8000 Jet


من فضلكم اناا محتار انهى احسن من حيث : الاداء والسرعة والكفاءة وكل حاجة يعنى ياريت تقوقلى قوتهم بالترتيب من الاعلى للاقل حسب الامكانيات وكمان من حيث السعر



وياريت اللى استخدم اى واحد يقولى مميزاته وعيوبه يعنى من الاخر محتاج نصيحة جاااااااااااااااادة


جزاكم الله كل الخير ارجو من كل من يشاهد الموضوع الرد باى معلومة لتعم الفائدة للجميع

[Dr Mohammad]

اتفضل دى مقارنة بين الomnia II و ال omnia HD

https://www.gsmarena.com/compare.php...&idPhone2=2691

ال OMNIA HD بيتفوق فى الشاشة عشان Capacitive و دى التتش بتاعها أفضل و نظام تشغيله سيمبيان و فيه بوصلة
إنما ال omnia II بيتفوق فى المعالج و كمان ويندوز موبايل و ده فى وجهة نظرى أقوى بكتير من السيمبيان لأنه نظام احترافى و قوى جدا و يعتبر كمبيوتر مصغر و لو عايز معلومات أكتر عن الويندوز موبايل راجع الموضوعين اللى فى توقيعى عن الكمبيوتر الكفى

و لو أنا مكانك هاجيب أومنيا II لأنه ويندوز موبايل بس اهم حاجة تجربه مع حد من اصحابك او تجرب أى ويندوز موبايل تانى حديث مع حد من اصحابك عشان تشوف انت مرتاح مع الويندوز موبايل و للا لأ , لأن فى ناس مابتعرفش تتعود عليه لأنه نظام عالى و قوى ما شاء الله

أما ال JET فدى مواصفاته
https://www.gsmarena.com/samsung_s8000_jet-2835.php

صحيح مواصفاته عالية بس نظام التشغيل بتاعه جافا و ده نظام ضعيف جدا و بالذات من حيث البرامج

و لا تنس صلاة الاستخارة


ملحوظة : يرجى اختيار عنوان مناسب للموضوع و سأقوم بتعديل العنوان

[stars_ramy]

أنا وأعوذ بالله من قولة أنا


بص يا باشا أنا جايلي موبايل omnia hd جديد بالضمان بتاعه كمان أسبوع ونص كده

لو عايز تشتريه أنا هبيعهولك أقل من سعر السوق ب 100 جنيه

ببساطة أنا كسبته في مسابقة وعايز أبيعة عشان أجيب لابتوب

انا مش تاجر والله ماتخافش ده انا أغلب من الغلب

بص بالنسبة لمواصفاته بحكم إني سألت عليه و أطقست (حبة ماركتينج ^_^)

هقارنلك بين التلاتة( واسأل وهتلاقي كلامي مضبوط)(كده كده انا هبيعه وهي عدة مطلوبة بعني مش سوقها نايم):

1- الشاشة:

omnia hd أحسن واحد في التلاتة
هو الوحيد اللي Capacitive زي ما قال Dr.Mohamed
وطبعا ده أحسن في دقة اللمس أنا مثلا عندي سامسونج ستار (كسبته برضه ههههه) ده شاشتة Resistive اللي هو النوع التاني المش كويس ،ممكن أدوس أقصى يمين الشاشة ومفيش حاجة أصلا في أقصى يمين الشاشة يروح مشغل الحاجة اللي موجودة على أقصى شمال الشاشة ،عشان هو بيقيس المكان اللي فيه ضغط على الشاشة مش بيقيس إنت صباعك فين فبيشوف أقرب حاجة لمكان الضغط ويشغلها

omnia II فيه ميزة واحده زيادة هي HandWriting recognition
omnia hd فيه ميزة Scratch resistance
JET أصغر شاشة فيهم 3.1 inch في مقابل 3.7 inch للاتنين التانيين

2-الاتصال (التردد ال2G & 3G وكده)

التلاتة زي بعض فيهم كل حاجة

3- الوزن و الحجم

بالترتيب من الأخف للأتقل
JET
Omnia II
Omnia hd

و بالترتيب من الأصغر للأكبر
نفس الترتيب اللي فات

3- الذاكرة
JET يدعم لغاية 16 GB
التانيين لغاية 32 GB

4-الكاميرا
بلا منافس حبيبي ال omnia hd 8MP HD بيصور فيديو HD كمان (مافيش منافس ليه في النقطة ده)
التانيين 5MP

5-GPS
كلهم بيدعموه ونفس المواصفات

6-البطارية
JET 1100 mAh
oMNIA HD & oMNIA ii 1500 mAh

الجيت أضعف



وزي ما قال dr Mohamed إن الجيت جافا وما انصحكش بيه لو هتختار خد من بين الاتنين التانيين

آه في معلومة بسيطة سمعتها إن سامسونج ما بقتش بتنزل أبديت جديد للجيت وبيقولا إن هي نسيت الجهاز خلاص
مش مهتمة بيه

وفيه ابديت جديد لسه نازل لل Omnia HD وكل الناس بتقول إن الابديت ده بيسرع الجهاز و خلا تصفح القائمة الرئيسية أسرع وكده

وده لينك الموضوع وزي ما قلتلك أنا مستعد ابيعهولك بس تقولي عشان أنا لما استلمه كمان اسبوع ونص كده هعرضه على الانترنت وكده

https://wrx-sti-blog.ru/view.php?vid...2B+a+bit+extra