دليلك لاختيار مبرد مناسب :)

**akrammlsh** · 11-09-2014, 15:38

بسم الله الرحمن الرحيم
انا حبيت اعمل الموضوع ده بعد ما قريت من اخواتنا الاعضاء مشكلة ارتفاع درجة حرارة اللاب و بعضهم بيتشري مبردات و مع ذلك مبتعملش فرق فان شاء الله في الموضوع هساعدكو تختارو المبرد المناسب لتحقيق الهدف منه

اولا: في لابات بتسحب هواء من تحت و في لابات بتطرد هواء من تحت عشان تعرف تحدد انت جهازك بيسحب هواء و لا بيطرد هواء من تحت ببساطة لو جهازك في فتحة تهوية من الاجناب من فوق يبقى جهازك بيسحب هواء من تحت فكدة انت محتاج مبرد بيطلع هواء مش بيسحب هواء و ده هتلاحظه في صور مسار الهواء من صور المنتج (بتبين اذا كان المبرد بيطلع هواء او بيسحب هواء)

ثانيا: ديه تعتبر اهم حاجة حضرتك ترفع جهازك و تشوف مكان فتحات التهوية من تحت لان على اساس مكان فتحات التهوية حضرتك هتختار المبرد المناسب لان على افتراض في لابات مبيبقاش فيها فتحات تهوية في اسفل منتصف اللاب فديه لو جبتلها مبرد في مروحة في المنتصف لو سبتها شغالة ليل نهار مش هتعمل اي فرق لان الهواء مش واصل اصلا للاب فديه نقطة مهمة ياريت نركز عليها و ايضا لو المبرد curve شوية يبقى افضل لان ده هيوفرلك مسار هواء كويس جدا للتهوية

ثالثا: حجم المبرد ياريت تراعي حجم المبرد عشان يبقى متوافق مع حجم اللاب عشان ميبقاش صغير عليها و اللاب يفضل يتحرك عليها و ميبقأش ثابت و ايضا لو بتتحرك بالاب لازم تراعي ان المبرد يبقى خفيف شوية عشان يسهل عليك الحركة و الشيل

رابعا: مش شرط ان مثلا لو مبرد فيه مروحة واحدة كبيرة يبقى افضل من مبرد تاني في كذة مروحة صغيرة ديه معتمدة على مكان فتحات التهوية و ايضا يفضل تدور على reviews للمبرد قبل ما تشتريه

خامسا: لاخواتنا الي عندهم لابات gaming ياريت يجيبو مبرد يكون محترم و تكون سرعة المراوح ايضا عالية عشان يحافظلك على الجهاز اثناء اللعب تعتبر cooler master بتعمل افضل مبردات للابات gaming

يارب اكون افدتكو و يارب الموضوع يعجبكو ان شاء الله